കോഴ: ജിഎസ്ടി കൗണ്‍സില്‍ സൂപ്രണ്ട് അറസ്റ്റില്‍

ന്യൂഡല്‍ഹി: കോഴക്കേസില്‍ ചരക്കു സേവന നികുതി (ജിഎസ്ടി) കൗണ്‍സില്‍ സൂപ്രണ്ടിനെയും ഇടനിലക്കാരനെയും സിബിഐ അറസ്റ്റ് ചെയ്തു.  മോനിഷ് മല്‍ഹോത്രയും ഇടനിലക്കാരന്‍ മാനസ് പത്രയുമാണ് പിടിയിലായത്. ഇതാദ്യമായാണ് ജിഎസ്ടി കൗണ്‍സില്‍ ഉദ്യോഗസ്ഥനെ സിബിഐ അറസ്റ്റ് ചെയ്യുന്നത്. സ്വകാര്യ വ്യക്തികള്‍ക്ക് അനര്‍ഹമായി ആനുകൂല്യങ്ങള്‍ നല്‍കി പകരം അവരില്‍ നിന്ന് കോഴ വാങ്ങിയെന്നാണ് കേസ്.  കോഴപ്പണം മല്‍ഹോത്ര സ്വന്തം അക്കൗണ്ടില്‍ ആദ്യം നിക്ഷേപിക്കുകയും പിന്നീട് ഭാര്യ ശോഭനയുടെ എച്ച്ഡിഎഫ്‌സി അക്കൗണ്ടിലേക്കും മകള്‍ ആയുഷിയുടെ ഐസിഐസിഐ അക്കൗണ്ടിലേക്ക് മാറ്റുകയുമാണ് ചെയ്തുവന്നത്. മല്‍ഹോത്രയുടെ വസതിയില്‍ സിബിഐ നടത്തിയ റെയ്ഡില്‍ കോഴപ്പണത്തിന്റെ രശീതികളും കോഴപ്പണവും പിടിച്ചെടുത്തിട്ടുണ്ട്.