പ്രണയാഭ്യര്‍ഥന നിരസിച്ച ബാലികയുടെ കൈ വെട്ടിമാറ്റി

ഷാജഹാന്‍പൂര്‍: പ്രണയാഭ്യര്‍ഥന നിരസിച്ച 15കാരിയുടെ കൈ 19കാരന്‍ വെട്ടിമാറ്റി. ഉത്തര്‍പ്രദേശിലെ ലഖിംപൂര്‍ ജില്ലയില്‍ ബുധനാഴ്ചയാണു സംഭവം. ലഖിംപൂര്‍ ഖേരി മാര്‍ക്കറ്റില്‍ ആളുകള്‍ നോക്കിനില്‍ക്കെയായിരുന്നു ആക്രമണം. പെണ്‍കുട്ടിയെ പിന്തുടര്‍ന്ന് ശല്യം ചെയ്ത വിനോദ് ചൗരസ്യയാണ് ക്രൂരകൃത്യം നിര്‍വഹിച്ചത്. പ്രണയാഭ്യര്‍ഥന ആവര്‍ത്തിച്ചു നിരസിച്ച പെണ്‍കുട്ടിയുടെ കൈ വാളുകൊണ്ട് വെട്ടിമാറ്റുകയായിരുന്നു. നാട്ടുകാര്‍ അക്രമിയെ പിടികൂടി പോലിസില്‍ ഏല്‍പ്പിച്ചു. പെണ്‍കുട്ടിയെ ആശുപത്രിയില്‍ പ്രവേശിപ്പിച്ചു. കുട്ടിയുടെ നില ഗുരുതരമാണെന്ന് ഖേരി ജില്ലാ ആശുപത്രി അധികൃതര്‍ വ്യക്തമാക്കി. കുറേ ദിവസമായി വിനോദ് തന്നെ ശല്യംചെയ്തുവന്നിരുന്നതായി പെണ്‍കുട്ടി രക്ഷിതാക്കളോട് പരാതി പറഞ്ഞിരുന്നുവെന്ന് ഖേരി എസ്പി എസ് ചിന്നപ്പ പറഞ്ഞു.