സിവില്‍ സര്‍വീസ് ചോദ്യങ്ങളില്‍ അവ്യക്തത : ഹരജി നല്‍കി

ന്യൂഡല്‍ഹി: സിവില്‍ സര്‍വീസ് പരീക്ഷയുടെ ചോദ്യങ്ങളില്‍ അവ്യക്തതയുണ്ടെന്ന് ചൂണ്ടിക്കാണിച്ച് പരീക്ഷാര്‍ഥികള്‍ സുപ്രിംകോടതിയില്‍ ഹരജി നല്‍കി. ഒബ്ജക്ടീവ് ചോദ്യങ്ങള്‍ക്ക് ഒന്നിലധികം ഉത്തരങ്ങളുള്ള ചോദ്യങ്ങളാണ് നല്‍കിയതെന്ന് ചൂണ്ടിക്കാണിച്ചാണ് ഹരജി. ഇത്തരത്തില്‍ നാല് ചോദ്യങ്ങളുണ്ടായിരുന്നുവെന്നും എട്ടോളം ചോദ്യങ്ങള്‍ സംശയം ജനിപ്പിക്കുന്ന രീതിയിലാണ് തയ്യാറാക്കിയതെന്നും ഹരജിയില്‍ പറയുന്നു. വോട്ട് ചെയ്യുന്നതിനുള്ള അവകാശം മൗലികപരമായ അവകാശമാണോ അതോ നിയമപരമായ അവകാശമാണോയെന്നതും സിന്ധു നദീതടസംസ്‌കാരം കുതിര സവാരിയെക്കുറിച്ച് അറിയുന്ന സംസ്‌കാരമായിരുന്നൊ അല്ലയോ, ആര്‍ക്കൊക്കെ ലോക്‌സഭയിലേക്ക് മല്‍സരിക്കാം തുടങ്ങിയ നാല് ചോദ്യങ്ങളുടെ ഉത്തരങ്ങളാണ് ആശയക്കുഴപ്പത്തിന് ഇടയാക്കിയത്.