ലാഹോര്‍: മുന്‍ പ്രധാനമന്ത്രി നവാസ് ശരീഫിന്റെ ഭാര്യ ബീഗം കുല്‍സൂം നവാസിനുവേണ്ടി മകള്‍ മര്‍യം നവാസ് പ്രചാരണത്തിന് ഇറങ്ങുന്നു. കഴിഞ്ഞ ദിവസം ലണ്ടനില്‍ നടത്തിയ പരിശോധനയില്‍ കുല്‍സൂമിന് തൊണ്ടയില്‍ കാന്‍സറാണെന്ന് കണ്ടെത്തിയിരുന്നു. ഇതേതുടര്‍ന്നാണ് മകള്‍ പ്രചാരണത്തിന് ഇറങ്ങുന്നത്. ദേശീയ അസംബ്ലി ഉപതിരഞ്ഞെടുപ്പില്‍ പാകിസ്താന്‍ മുസ്്‌ലിംലീഗിനുവേണ്ടി ലാഹോറിലാണ് നവാസ് ശരീഫിന്റെ ഭാര്യ മല്‍സരിക്കുന്നത്. പാനമ അഴിമതി കേസുമായി ബന്ധപ്പെട്ട് പാക് സുപ്രിംകോടതി ആവശ്യപ്പെട്ടതിനെത്തുടര്‍ന്ന് നവാസ് ശരീഫ് പ്രധാനമന്ത്രി പദവും പാര്‍ലമെന്റ് അംഗത്വവും രാജിവച്ചിരുന്നു. ശരീഫിന്റെ രാജിയെത്തുടര്‍ന്ന് ഒഴിവുവന്ന സീറ്റിലേക്കാണ് കുല്‍സൂം മല്‍സരിക്കുന്നത്. കാന്‍സര്‍ തുടക്കത്തില്‍ കണ്ടെത്തിയതിനാല്‍ കുല്‍സൂം നവാസിന്റെ ചികില്‍സ ഉടന്‍ ആരംഭിക്കുമെന്ന് മകള്‍ ട്വിറ്ററില്‍ അറിയിച്ചു.
