ദുബൈ: ഐ.സി.സിയുടെ ഏറ്റവും പുതിയ ഏകദിന റാങ്കിങില്‍ ഇന്ത്യന്‍ നായകന്‍ വിരാട് കോഹ്‌ലി ഒന്നാം സ്ഥാനത്ത് തുടരുന്നു. 873 പോയിന്റുകളുമായാണ് ഇന്ത്യന്‍ നായകന്‍ സ്ഥാനം നിലനിര്‍ത്തിയത്. ആസ്‌ത്രേലിയന്‍ ഓപണര്‍ ഡേവിഡ് വാര്‍ണറാണ് രണ്ടാം സ്ഥാനത്ത്.
കോഹ്‌ലിയും വാര്‍ണറും തമ്മില്‍ 12 പോയിന്റുകള്‍ വ്യത്യാസമുണ്ട്. 12ാം സ്ഥാനത്തുള്ള എം.എസ് ധോണി, 13ാം സ്ഥാനത്തുള്ള ശിഖര്‍ ധവാന്‍, 14ാം സ്ഥാനത്തുള്ള രോഹിത് ശര്‍മ എന്നിവരാണ് ആദ്യ പതിനഞ്ചില്‍ ഇടംകണ്ട് മറ്റ് ഇന്ത്യന്‍ താരങ്ങള്‍. ശ്രീലങ്കക്കെതിരായ ആദ്യ ഏകദിന പോരാട്ടം നടക്കാനിക്കാനിരിക്കേ റാങ്കിങില്‍ ഒന്നാമതുള്ള കോഹ്‌ലിക്ക് ഈ പരമ്പരയില്‍ മികച്ച പ്രകടനം പുറത്തെടുത്ത് സ്ഥാനം നിലനിര്‍ത്താം.
ബൗളര്‍മാരുടെ പട്ടികയില്‍ ആദ്യ പത്തില്‍ ഒരിന്ത്യന്‍ താരവും ഇടംപിടിച്ചില്ല. 13ാം റാങ്കിലുള്ള ഭുവനേശ്വര്‍ കുമാര്‍ മാത്രമാണ് ആദ്യ പതിനഞ്ചിനുള്ളില്‍ ഇടം കണ്ട ഏക ഇന്ത്യന്‍ താരം. ഏകദിന ടീം റാങ്കിങില്‍ ഇന്ത്യ മൂന്നാം സ്ഥാനത്ത് തുടരുന്നു. 114 പോയിന്റുമായാണ് ഇന്ത്യ മൂന്നാമതുള്ളത്.
