ധക്ക: ശക്തമായ മഴമൂലമുണ്ടായ വെള്ളപ്പൊക്കത്തില്‍ ബംഗ്ലാദേശില്‍ 27 പേര്‍ മരിച്ചു. ഇരുപതിലധികം ജില്ലകള്‍ വെള്ളത്തിനടിയിലായി. ശക്തമായ മഴയെ തുടര്‍ന്ന് മേഖലയിലെ ഉയര്‍ന്ന പ്രദേശങ്ങളില്‍ നിന്ന് വെള്ളം കുത്തിയൊഴുകുകയായിരുന്നുവെന്നും ആറ് ലക്ഷത്തോളം ആളുകളെ ശക്തമായി ബാധിക്കുന്നതാണ് ദുരന്തമെന്നും ദുരന്ത നിവാരണ മന്ത്രി മൊഫാസല്‍ ഹുസയ്ന്‍ ചൗധരി വ്യക്തമാക്കി. മൂന്ന് ലക്ഷത്തിലധികം ആളുകളെ അഭയാര്‍ഥി ക്യാംപുകളിലേക്ക് മാറ്റിയതായും ചൗധരി പറഞ്ഞു. മേഖലയിലെ റെയില്‍ പാളങ്ങളും റോഡുകളും തകര്‍ന്നതിനാല്‍ ഗതാഗത സംവിധാനം പാടേ തകര്‍ന്നിരിക്കുകയാണ്. കുരിഗ്രാം മേഖലയില്‍ 60,000 കുടുംബങ്ങളും നില്‍ഫാമാരി മേഖലയില്‍ 40 കുടുംബങ്ങളും ഒറ്റപ്പെട്ടു കിടക്കുകയാണ്. ഇവരിലേക്ക് ദുരിതാശ്വാസ സഹായങ്ങള്‍ എത്തിക്കാനുള്ള ശ്രമം തുടരുകയാണെന്നും അധികൃതര്‍ പറഞ്ഞു.
