ചണ്ഡീഗഢ്: ഞാന്‍ അതിജീവിച്ചവളാണ്, പിന്നെന്തിന് മുഖം മൂടി നടക്കണമെന്ന് ബിജെപി നേതാവിന്റെ മകന്റെ അക്രമത്തില്‍ നിന്നും രക്ഷപ്പെട്ട യുവതി. ഈ പെണ്‍കുട്ടിയെന്തിന് അര്‍ധരാത്രി ഒറ്റക്ക് പുറത്തുപോയതെന്ന ഹരിയാന ബി.ജെ.പി വൈസ് പ്രസിഡന്റ് രാംവീര്‍ ഭാട്ടിയുടെ ചോദ്യത്തിനും പെണ്‍കുട്ടി ശക്തമായ ഭാഷയില്‍ മറുപടി നല്‍കി. ഞാന്‍ എന്തു ചെയ്യുന്നു, എവിടെ പോകുന്നു എന്നതൊക്കെ ഞാനും എന്റെ കുടുംബവുമായി ബന്ധപ്പെട്ട കാര്യമാണ്, അതില്‍ മറ്റാരും ഇടപെടേണ്ടെന്നുമായിരുന്നു പെണ്‍കുട്ടിയുടെ മറുപടി. ‘ലൈംഗിക പീഡന കേസിലും സമാനമായ പല സംഭവങ്ങളിലും ഇരയായ പെണ്‍കുട്ടികളെ പോലെ എനിക്ക് മുഖം മൂടി നടക്കേണ്ട. ഞാന്‍ അക്രമത്തെ അതിജീവിച്ചയാളാണ്. കുറ്റം ചെയ്ത ആളല്ല’, ഒരു ദേശീയ മാധ്യമത്തിന് അനുവദിച്ച അഭിമുഖത്തില്‍ പെണ്‍കുട്ടി പ്രതികരിച്ചു.
