തിരുവനന്തപുരം: കേരളപ്പിറവി ആഘോഷങ്ങള്ക്ക് ഗവര്ണര്ക്കു പുറമെ മുന് മുഖ്യമന്ത്രിമാരെയും മറന്ന് ഇടതു സര്ക്കാര്. മുന് മുഖ്യമന്ത്രിമാരായ ഉമ്മന്ചാണ്ടി, വി.എസ് അച്യുതാനന്ദന്, എ.കെ ആന്റണി എന്നിവരെയാണ് വജ്രകേരളമെന്ന പരിപാടിയില് നിന്ന് ഒഴിവാക്കിയത്.
പ്രത്യേക സമ്മേളനത്തിനായി വി.എസ് അച്യുതാനന്ദനും ഉമ്മന്ചാണ്ടിയും സഭയില് ഉണ്ടായിരിക്കെ നിയമസഭക്കു പുറത്തു നടക്കുന്ന പരിപാടിയില് നിന്ന് ഇരുവരെയും ഒഴിവാക്കിയത് വ്യാപകമായ ആക്ഷേപത്തിനിടയാക്കി. നിയമസഭാ സമ്മേളനത്തിനു ശേഷം വി.എസും ഉമ്മന്ചാണ്ടിയും വീടുകളിലേക്ക് മടങ്ങി.
60 പേരെ വേദിയിലേക്കും ആയിരത്തോളം പേരെ സദസ്സിലേക്കുമാണ് കേരളപ്പിറവി ആഘോഷപരിപാടികളുടെ ഉദ്ഘാടനത്തിനായി ക്ഷണിച്ചിരുന്നത്. എന്നാല് വേദിയില് ഇരിക്കേണ്ട 60 പേരുടെ പട്ടികയില് മൂവരുടെയും പേര് ഉള്പ്പെട്ടിരുന്നില്ല.
