ഫ്രാങ്ക്ഫർട്ട് ആംമെയ്ൻ: പൈലറ്റ് സമരത്തെ തുടർന്ന് ജർമനിയിലെ ലുഫ്താൻസ എയർലൈൻസ് 900തോളം വിമാന സർവീസുകൾ റദ്ദാക്കി. ഷെഡ്യൂൾ ചെയ്ത 3000 ഫ്ലൈറ്റുകളിൽ 876 എണ്ണമാണ് റദ്ദാക്കിയത്. വേതന തർക്കത്തെ തുടർന്നാണ് പൈലറ്റ് യൂണിയൻ സമരം പ്രഖ്യാപിച്ചത്. പൈലറ്റ് സമരം ജർമനിയിലെ പതിനായിരക്കണക്കിന് യാത്രക്കാരെ പ്രതികൂലമായി ബാധിച്ചു.
2014 ഏപ്രിലിന് ശേഷം പൈലറ്റ് യൂണിയൻ പ്രഖ്യാപിച്ച 14മത്തെ സമരമാണിത്. വർഷത്തിൽ 3.66 ശതമാനം വേതന വർധനവാണ് യൂണിയൻ ആവശ്യപ്പെടുന്നത്. എന്നാൽ, 2.5 ശതമാനം വേതന വർധനവാണ് വിമാനകമ്പനി വാഗ്ദാനം ചെയ്യുന്നത്. വൻ വരുമാനമുള്ള ജർമനിയിലെ പ്രധാനപ്പെട്ട വിമാനകമ്പനിയാണ് ലുഫ്താൻസ എയർലൈൻസ്.
